कविता- असाच एक दिस असावा

श्रावण 

ऋतू हिरवा...! ऋतू बरवा...! पावसाळा. त्यात श्रावण म्हणजे कहर. बालकवींनाही मोहिनी घालणारा हा श्रावण, खरं तर ऋतूंचा राजा आहे असं म्हटलं तर वावगं ठरू नये. वसंताचा आपलाच रुबाब, पण श्रावणात फुलणार्या रानफुलांचा, गवतफुलांचा ज्याला लळा लागला त्यालाच पुसावे, श्रावण म्हणजे काय...?

 असाच एक दिस असावा

असाच एक दिस असावा
माझ्या सोबत मीच असावा
दूर वनी श्रावणसरी
ऊन-पावसाचा खेळ असावा

हिरव्या पिवळ्या गालिच्यावर
रानफुलांचा साज असावा
खळखळणार्या पाटाचा
सोबतीला नाद असावा

पानावरल्या थेंबाला
रविकिरणांचा छेद असावा
लाखमोलाचा ऐवज तो
कधीतरी मज दिसावा

असाच एक दिस असावा
माझ्यासोबत मीच असावा
श्रावणातल्या कैफात
माझ्यातला मी हरवावा

असाच एक दिस असावा
असाच एक दिस असावा

_विजय सावंत

फोटो- विजय सावंत