कविता- पन्नाशी

 पन्नाशी

चला आज एक आणखी पायरी गाठली

कळलंच नाही कधी मी पन्नाशी गाठली

आयुष्याची माझ्या अर्धी वर्षे लोटली

मस्त डुंबून घ्यायचं आता जी आहेत उरलेली 

काय कमावलं काय गमावलं हिशोब का मांडू

भरभरून जगलेलं उगाच का सांडू

प्रत्येक क्षण आयुष्याचा होता खळखळाट 

लुटलं निसर्गसौंदर्य मी फिरलो मनमुराद

निसर्गाने शिकवलं मला काय असतं औदार्य

माणसाने राखावं सदा त्याच्याशी सौहार्द

नातं जपलं जीवापलीकडे खोटं का बोलू

आठवण नाही काढत म्हणून नका तुम्ही तोलू

सहज सोपं नसतं आयुष्य खरं आहे म्हणणं

त्यातच गायचं आनंदाने आपलं जीवन गाणं

लाख लाख शुभेच्छा तुमच्या असो सदा पाठी

आयुष्याची पुढील वर्षे माझी राहो तरणीताठी

_विजय सावंत

१४/०८/२०२१